’ரைட்டர்’ கடுதாசி

நெடுநாட்களுக்குப் பின் பதிவு பக்கம் வரலாமென்ற எண்ணத்தைத் தோற்றுவித்தது எனக்கு வந்த இந்த வாசகர் கடிதம். பதிவுலகில் பிரபலமானவர்களுக்கு வாசகர்கள் கடிதங்கள் எழுதுவதும் அதை அவர்கள் பிரசுரிப்பதும் சகஜம்தான் என்றாலும் எனக்கும் ஒரு வாசகர் கடிதம் வந்திருக்கிறது அதுவும் நான் பதிவெழுதத் துவங்கி இத்தனை ஆண்டுகளில் வந்திருக்கும் ஒரே வாசகர் கடிதம் எனும்போது அதைப் பிரசுரிக்காமல் இருக்க முடியுமா என்ன?

அன்புள்ள அண்ணாச்சி,

நீண்ட நாட்களாகவே உங்கள் பதிவுகள் வறட்சியாகக் காட்சியளிப்பதைக் கண்டு இதயம் வெம்பியிருக்கும் கோடானுகோடி தொண்டர்களில் நானும் ஒருவன்.

ஏன் பதிவுகள் எழுதுவதில்லை? எங்கள் எழுதாக் கடிதங்கள் வராக்கடிதங்கள் ஆகிவிட்டதாலா?

லாக்கப்பில் போட்டு முட்டிக்கு முட்டி தட்டினால் எழுதுவீர்கள் என்றால் சொல்லுங்கள்,  இதயத்தைக் கல்லாக்கிக் கொண்டு அதையும் செய்யத் தயாராகி விடுகிறோம்.

சென்ற வாரம் ஹோட்டலில் சாப்பிட்டு விட்டுத் திரும்புகையில் சுமார் முப்பத்தைந்து பேர் என்னைச் சூழ்ந்துகொண்டு ஏன் அண்ணாச்சி பதிவு எழுதுவதில்லை, இன்னும் ஒரு வாரத்தில் பதிவு வராவிட்டால் உன்னைச் சும்மா விடமாட்டோம் என்று அன்பு கலந்த மிரட்டலை வெளிப்படுத்தினார்கள். 

போர்ஹேஸும் ஆல்பர் காம்யூவும் வள்ளுவரும் வாத்சாயனரும் ஒருங்கே தூங்கிக்கொண்டிருக்கும் உன்னத எழுத்தைக் கொண்ட தங்கள் பேனா தூங்கலாமா, மவுஸ் ஓயலாமா, கலப்பை துருப்பிடிக்கலாமா?

இப்படிப்பட்ட வாசகர்களைக் கையில் வைத்துக்கொண்டு சாக்ரடீஸா ரேட்டிங்கில் முதலிடம் பெறாமல் அமைதியாக இருப்பதுவும் ஏன்?

அமீரக தாதாக்கள், மிட்டா மிராசுகள் சொல்படி,

பினாத்தல் சுரேஷ்.

பெரிய ‘ரைட்டர்’ ஆன பிறகும் கூட இப்படி ஒரு கடுதாசி போட்டிருப்பதை நினைச்சு எனக்கு அழுவாச்சியாவே இருக்கு..நல்லா இருலே மக்கா!!