சிநேகிதிகளின் கணவர்கள்

மனுஷ்யபுத்திரனின் கவிதைகளைப்பற்றி நான் விரிவாகச் சொல்லிதான் நீங்களெல்லாம் தெரிந்து கொள்ள வேண்டுமென்பதில்லை. வார்த்தைகளுக்குள் வாழ்க்கையின் சூட்சுமங்களை சுவைபடச் சொல்லும் தேர்ந்த கவிதைகளுக்குச் சொந்தக்காரர் அவர்.

சமீபத்தில் 'பண்புடன்' குழுமத்தில் இந்தக் கவிதையைப் பற்றி பேசினோம்.இந்தக் கவிதை எனக்கு வெகுவாகப் பிடித்து விட்டதால் இதற்கு ஒலிவடிவம் கொடுத்து அதனை மனுஷ்யபுத்திரன் அவர்களுக்கே அனுப்பினேன். கேட்டு விட்டு உடனே பதிலெழுதிய அவர் "பொதுவாகக் கேட்பதற்கு மிகவும் இனிமையாகவும் உணர்வுபூர்வமாகவும் வாசித்திருகிறீர்கள். சில இடங்களில் சற்று வேகமாக வாசித்திருக்கிறீர்கள். பத்திகளுக்கு இடையே கொஞ்சம் நிதானம் தேவை. இசை சற்று தூக்கலாக இருப்பதுபோல உள்ளது. இரண்டையும் சற்று சரிசெய்தால் பொருள்கொள்ள உதவியாக இருக்கும்" என்று உடனே பதிலெழுதினார்.

அவருக்கு திருப்தியில்லாமல் வலையேற்ற எனக்குச் சம்மதமில்லாமல் இருந்ததால் அவர் கேட்டிருந்த சில மாற்றங்களைச் செய்து மீண்டும் அனுப்பினேன். "புதிய ஒலிவடிவம் கேட்டேன். மிகவும் நன்றாக வந்திருக்கிறது. முந்தைய குறைபாடுகள் சரிசெய்யப்பட்டு நேர்த்தியாக இருக்கிறது. என் சிநேகிதிகளுக்கு அனுப்பி வைக்கிறேன்" என்று பதில் எழுதியிருந்தார். மிகுந்த மகிழ்ச்சியாக இருந்தது.

முன்னர் உலகத்தமிழ்செய்திகளுக்காக கவிதை வாசித்தபோது என் தந்தையாரும் உடனிருந்தார். நான் கவிதை வாசித்தபோது" என்னடா வாசிக்கிறே? ஒரு பாவனையும் இல்லாமல்? கொஞ்சம் உணர்வுபூர்வமாக வாசிக்கக் கூடாதா?" என்றார். "உணர்வுபூர்வமாக வாசிக்க இது என்ன நாடகமா? இது கவிதை. கவிதையில் அதைக் கூட்டுகிறேன் இதைக் குறைக்கிறேன்' என்று சொல்லி அதை இல்லாமல் செய்து விடக் கூடாது" என்று வீர வசனம் பேசினேன். வாசிக்கத் தெரியவில்லை என்று எப்படி நேரடியாக ஒப்புக்கொள்வது? இம்முறை கவிதையை அவருக்கும் அனுப்பியிருந்தேன்.

"அருமை. அருமை" என்று பதிலெழுதியிருந்தார். வாப்பாவிடமிருந்து இதனைப் பெறுவது அது எத்தனை சிரமம் என்பது எனக்குத்தான் தெரியும். எனவே, உண்மையிலேயே காற்றில் மிதந்து கொண்டிருப்பது போலுணர்ந்தேன்.அந்த தைரியத்தில்தான் இதனைக் குரல் பதிவாகவே இங்கே இடுகிறேன்.

கவிதையை உபயோகப்படுத்த மனமுவந்து சம்மதித்த மனுஷ்யபுத்திரன் அவர்களுக்கும், இசை வடிவம் தந்த ஏ.ஆர்.ரஹ்மானுக்கும் :-) நெஞ்சம் நிறைந்த நன்றி!!

இனி கவிதையைக் கேளுங்கள். பொறுமையில்லாதவர்கள் கவிதையை வாசித்து மகிழுங்கள்

சிநேகிதிகளின் கணவர்களுடனான

சிநேகங்களில்

எப்போதும் உருவாகிவிடுகிறது

ஒரு சதுரங்கக் கட்டம்

ஒரு கலைக்கமுடியாத பாவனையின்

மர்ம நிழல்

ஒரு சர்க்கஸ் கோமாளியின்

அபாயகரமான சாகசங்கள்

ஒரு அபத்த வெளியில்

விரிக்கப்பட்ட வலை

சிநேகிதிகளின் கணவர்களுடனான

சிநேகங்களில்

என் சிநேதிகளின் கண்களை
முற்றாகத் தவிர்த்துவிடுகிறேன்

அவளது ஆடையின் வண்ணங்களை
அவளது தேனீரின் ரகசியப் பிரியங்களை

மறுதலித்துவிடுகிறேன்

அவளைப் பற்றிய ஒரு நினைவை
வேறொரு சம்பவத்தோடு இணைத்துவிடுகிறேன்

அவளது கணவனைப்போலவே
அவளது இருப்பை
ஒரு விளையாட்டுப் பொருளாக்குகிறேன்

சிநேகிதிகளின் கணவர்களுடனான

சிநேகிதங்களில்

நாம் அனுமதிக்கப்படுவது

ஒரு கருணை

அது நம்மிடம் காட்டப்படும்

ஒரு பெருந்தன்மை

சில சமயம் நம் சிநேகிதிகளுக்கு

காட்டப்படும் பெருந்தன்மை

நாம் சந்தேதிக்கப்படவில்லை
என நம்மை நம்ப வைக்கும்

ஒரு தந்திரமான விளையாட்டு

சிநேகிதிகளின் கணவர்களுடனான

சிநேகங்களில்

என் சிநேகிதி எப்போதும்

பிசாசுகளின் புதிர்மொழியொன்றைப்

பேசுகிறாள்

உரையாடல்களின்

அபாயகரமான திருப்பங்களை

பதற்றத்துடன் லாவகமாகக் கடந்து செல்கிறாள்

எதைப் பற்றிய பேச்சிலும்

கணவரைப் பற்றிய

ஒரு பின்குறிப்பை இணைத்துவிடுகிறாள்

ஒவ்வொரு சந்திப்பின் முடிவில்

மிகவும் ஆயாசமடைந்து

கணவர்கள் மட்டுமே நண்பர்களாக இருப்பது

நல்லது என்று யோசிக்கத் தொடங்குகிறாள்

சிநேகிதிகளின் கணவர்களுடனான

சிநேகங்களின் இடையே இருப்பது

ஒரு உறவல்ல

இலக்குகள் ஏதுமற்ற

ஒரு பந்தயம்

ஒரு அன்னியனுக்குக் காட்டும்

வன்மம் மிகுந்த மரியாதை

ஒரு சட்டப்பூர்வ உரிமையாளனுக்கு எதிராக

ஒரு பொறுக்கியின் ரகசிய கலகம்

தொண்டையில் நிரந்தரமாகத் தங்கிவிட்ட

ஒரு மீன் முள்

சிநேகிதிகளின் கணவர்களுடனான

சிநேகங்களில்
நான் எனது பழக்கவழக்கங்களை

மாற்றிக் கொள்கிறேன்

அவர்களது எல்லா அக்கறைகளையும்

எனது அக்கறைகளாக்கிக் கொள்கிறேன்

சிநேகிதிகளுடன் பேச
ஒரே ஒரு விஷயம் போதுமானதாக இருந்தது

அவர்களின் கணவர்களுடன் பேச

ஏராளமான கச்சாப் பொருள்கள் தேவைப்படுகின்றன

சிநேகிதிகளின் கணவர்களுடனான

சிநேகங்களில்

சிநேகிதிக்குப் பதில்
சிநேகிதியின் குழந்தைகளை

நேசிக்கக் கற்றுக் கொண்டேன்

எவ்வளவு குடிக்க வேண்டும்

ஜோக்குகளை எங்கே நிறுத்த வேண்டும்

நாற்காலிகள் எவ்வளவு தூரத்தில் அமையவேண்டும்

எந்தக் கணத்தில் வெளியேற வேண்டும்

என எல்லாவற்றையும் பழகிக் கொண்டேன்

நான் குழப்பமடைவதெல்லாம்

சிநேகிதியை பெயர் சொல்லாமல்

எப்படி அழைப்பது என்று

அல்லது பெயர்களை

வெறும் பெயர்களாக மட்டும்

எப்படி உச்சரிப்பது என்று

ஒரு சிநேகிதியை

‘ சிஸ்டர்’ என்று அழைக்கும்
ஒரு ஆபாச கலாச்சாரத்திலிருந்து

எப்படித் தப்பிச் செல்வது என்று